एजेन्सी-  च्याम्पियन्स लिग फुटबलमा चेल्सीले रसियन क्लब क्रास्नोडारमाथि सहज जित निकालेको छ ।

बुधबार राति समूह ‘ई’ को खेलमा चेल्सीले रसियन क्लब एफके क्रास्नोडारमाथि ४–० को जित निकालेको हो ।

चेल्सीका लागि जियाचले पहिलो गोल गरे । उनले डेबिड वार्नरको पासलाई सदुपयोग गर्दै ७९औं मिनेटमा गोल गरेका थिए ।

खेलमा अग्रता भने ३७औं मिनेटमा हुडसन ओडोईले दिलाएका थिए । काई हाभर्ट्जको पासलमा ओडोईले लण्डन क्लबलाई अघि बढाएका थिए ।

७६औं मिनेटमा वार्नरले पेनाल्टीमा चेल्सीको अग्रता दोब्बर बनाए । जोर्गिन्हो पेनाल्टीमा चुक्दा सुरुवातमा अग्रता लिने अवसर गुमाएको चेल्सीका लागि दोस्रो पेनाल्टी वार्नरले गरेका थिए ।

जियासको गोलसंगै ३–० ले अघि बढेको चेल्सीका लागि खेलको अन्तिम मिनेटमा क्रिस्टियन पुलिसिकले चौथो गोल थपेका थिए । टोमी अब्राहमको पासलाई सदुपयोग गर्दै पुलिसिकले गोल गरेका थिए ।

च्याम्पियन्स लिगको सुरुवाती दुई खेलमा चार अंक जोड्दै चेल्सीले उत्कृष्ट सुरुवात गरेको छ । समूहमा चेल्सी ४ अंक सहित शीर्ष स्थानमा छ ।