काठमाडौं- जनता समाजवादी पार्टीका नेता राजेन्द्र महतोले प्याकेजमा संविधान संशोधन गर्न माग गरेका छन् ।

आज साझ रेडियो काठमाडौं ९२.१ मेघाहर्जमा युपी लामिछानेसँगको अन्तर्वार्तामा महतोले संविधानको अनुसूचीमा नेपालको नयाँ नक्सासहितको निशान छाप परिवर्तन गर्न सरकारले ल्याएको संशोधन प्रस्तावसँगै आफूहरुले उठाएका माग पिसँगै अगाडि बढाउनुपर्ने बताएका हुन् ।

मधेस केन्द्रीत दलले प्रदेशको सिमांकन, नागरिकता,भाषा, संघीय आयोग गठन लगायतका विषयमा संविधानमा भएको वयवस्था संशोधनको माग गर्दै आएका छन् ।

उनले नेपालको अतिक्रमित भूमि फिताए ल्याउनुपर्ने र त्यसका लागि राष्ट्रिय सहमति आवश्यक रहेको बताए ।

“हाम्रो जमिन फिर्ता गर्ने हो । सरकारलाई हामीले त्यसमा साथ र समर्थन लिएर, राष्ट्रिय सहमति जुटाएर जाउ भनिरहेका छौं” उनले भने, “ अर्को मधेसी, जनजाति, थारुहरुले आवाज उठाएको संविधान संशोधनका माग पनि प्याकेजमा गर्नुपर्छ ।’

नेता महतोले तत्कालीन प्रधानमन्त्री शेरबहादुर देउवा र तत्कालीन नेकपा एमालेका नेता केपी ओलीले महाकाली सन्धी गर्दा राष्ट्रघात गरेको आरोप पनि लगाए ।

महाकाली सन्धी अध्ययन कार्यदलको संयोजक रहेका ओलीले सन्धी छिटो पारित गराउनुपर्छ भनेको पनि उनले स्मरण गरे ।

नेता महतोले महाकाली सन्धी गर्दा दौरा शुरुवाल र टोपी लगाउनेले नै राष्ट्रघात गरेको भनदै मधेसका धोती लाउनेले कहिल्यै राष्ट्रघात नगरेको बताए ।