काठमाडौं- प्रधानमन्त्री केपी शर्मा ओलीले आफू पक्षधर सांसदहरुको हस्ताक्षर संकलन गरेका छन् ।
बुधवार प्रधानमन्त्री ओलीले सांसदहरुलाई बालुवाटार बोलाएर हस्ताक्षर गराएका हुन् ।
सरकारविरुद्ध अविश्वासको प्रस्ताव ल्याउने तयारी भएको चर्चाका बीच सांसदहरुले हस्ताक्षर गरेका हुन् ।
केपी ओली नेतृत्वको सरकारको प्रतिरक्षाका लागि आफूहरुले हस्ताक्षर गरेको संघीय सांसद कृष्ण राईले जानकारी दिए ।
प्रधानमन्त्री नै फेर्ने तयारी गरेपछि प्रधानमन्त्री ओलीको प्रतिरक्षा गर्नु नै पर्यो, त्यसैले हस्ताक्षर गर्ने काम भयो, राईले भने ।
राइले ओलीको पक्षमा बहुमत सांसदले हस्ताक्षर गरेको दाबी गरे ।
नेकपा सांसद महेश बस्नेतले प्रधानमन्त्री विरुद्ध मोर्चाबन्दी भइरहेको भन्दै हस्ताक्षर संकलनले त्यस्ता मोर्चाबन्दी रोकिने दाबी गरे ।
प्रधानमन्त्री ओली विरुद्ध विभिन्न नाममा मोर्चाबन्दी रहेका छन् । बहुमत सांसदहरुको साथ पाएपछि मोर्चाबन्दी गर्नेहरुले थाहा पाउनेछन् उनले भने ।
सांसद बस्नेतले पार्टी विभाजन रोक्नका लागि बहुमत देखाउनु परेको बताए ।
सांसद बस्नेतले ओलीको पक्षमा १०० भन्दा धेरै सांसद रहेको दाबी गरे ।
नेकपामा १ सय ७२ सांसद रहेका छन् । संसदीय दलमा बहुमतका लागि ८८ सांसद आवश्यक पर्छ ।
पछिल्लो केही दिन यता नेकपाको विवाद उत्कर्षमा पुगेको छ ।
प्रतिक्रिया