विराटनगर– प्रदेश नम्बर १ को ताप्लेजुङ र उदयपुरमा गरी लडेर २ जनाको मृत्यु भएको छ ।

ताप्लेजुङको फक्ताङलुङ गाउँपालिका–४ का ५२ वर्षीय मिन बहादुर लाबुङ लिम्बुको घर नजिकै रहेको कुटमिरोको रुखबाट लडेर मृत्यु भएको हो ।

शनिबार बलेका ६ बजेतिर कुटमिरोको रुखबाट घाँस झार्ने क्रममा लडेर घाइते भएका लिम्बुलाई उपचारका लागि स्थानीय स्वास्थ्य चौकीमा लैजाने क्रममा बोटोमा नै मृत्यु भएको हो ।

यस्तै, उदयपुरको उदयपुरगढी गाउँपालिका–५ का कृष्ण बहादुर राईको घरबाट लडेर मृत्यु भएको छ ।

छिमेक खेम बहादुर भुजेलको निर्माणाधीन घर हेर्न भनेर गएका राई सोही घरबाट लडेर घाइते भएका थिए ।

घरबाट लडेर गम्भीर घाइते भएका राईलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लगिएको थियो । राईको उपचारकै क्रममा शनिबार राति १० बजे मृत्यु भएको १ नम्बर प्रदेश प्रहरी कार्यालय विराटनगरले जानकारी दिएको छ ।