काठमाडौं– अमेरिकाले नेपालमा रहेका अमेरिकी नागरिकलाई स्वदेश फर्काउने भएको छ ।

मंगलबार र विहीबार दुई दिन चार्टर्ड विमानमार्फत उनीहरुलाई स्वदेश फर्काउन लागिएको नेपालस्थिति अमेरिकी दूतावासले जनाएको छ ।

नेपालका लागि अमेरिकी राजदूत र्‍याण्डी बेरीले स्वदेश फर्किन चाहने अमेरिकी नागरिकलाई सम्पर्क गर्न समेत अनुरोध गरेका छन् ।

दूतावासका अनुसार मंगलबार र विहिबार काठमाडौंबाट चार्टड विमान अमेरिकाको वासिंटन डिसी जानेछ । हाल दूतावासले नेपालभर रहेका र अमेरिका फर्कन चाहने नागरिकहरुलाई काठमाडौंमा जम्मा गरिरहेको छ ।

पोखरा र लुक्लामा रहेका केही अमेरिकन नागरिकलाई उद्धार गरेर काठमाडौं ल्याइएको दूतावसले जनाएको छ । उनीहरुलाई मंगलबार र विहीबार गरी अमेरिका पठाइनेछ ।

नेपाल पर्यटन बोर्ड र स्थानीय सीडीओहरुसँग समन्वय गरेर विभिन्न जिल्लामा रहेका अमेरिकी नागरिकलाई काठमाडौं आउने वातावरण बनाइरहेको दूतावासले जनाएको छ ।

दूतावाले अमेरिकी विदेशमन्त्रालयसँग चार्टड फ्लाइटका सन्दर्भमा समन्वय गरिरहेको र पहिलो उडान मंगलबार मार्च ३१ मा काठमाडौंबाट वासिंटन डिसीका लागि हुने दूतावासको भनाइ छ ।

दोश्रो उडान अप्रिल २ बिहिबार हुने तर दुबै उडानका लागि समय तय हुन बाँकी रहेको दूतावासले जनाएको छ ।