काठमाडौं– सरकारले नेपाल भ्रमण वर्ष २०२० को विदेशमा प्रचारप्रसार स्थगित गरेको छ ।

चीनबाट सुरु भएको कोरोना भाइरसको संक्रमण युरोपसम्म पुगेपछि सरकारले यस्तो निर्णय गरेको संस्कृति, पर्यटन तथा नागरिक उड्ययनमन्त्री योगेश भट्टराईले बताए । उनका अनुसार केही समयका लागि भ्रमण वर्षको प्रचार स्थगित गरिएको हो ।

शनिबार आयोजित बौद्ध चामुण्डा हेरिटेज वाक कार्यक्रममा पर्यटनमन्त्री भट्टराईले भने, ‘जब परिस्थितिअनुकुल हुन्छ, सन्त्रासहरु हट्दै जान्छन्, त्यसपछि हामी सक्रियताका साथ भ्रमण वर्षको प्रवद्र्धनात्मक कार्यक्रम गर्नेछौँ ।’

उनले देशभित्रकै पर्यटन प्रवर्धनमा जोड दिने बताए । कोरोनाले भ्रमण वर्षमा २० लाख पर्यटक ल्याउने लक्ष्यलाई समेत असर गर्ने देखिएको उनले बताए ।