काठमाडौँ-  चिनियाँ कम्युनिष्ट पार्टीको अन्तर्राष्ट्रिय विभागका उपमन्त्री कुओ येचौको नेतृत्वमा आएको चार सदस्यीय टोली र प्रधानमन्त्री केपी शर्मा ओलीबीच भेटवार्ता भएको छ।

प्रधानमन्त्री निवास बालुवाटारमा चिनियाँ टोलीले दुई देशबीचको हितका विषयमा कुराकानी गरेको प्रधानमन्त्री ओलीका परराष्ट्र मामिला सल्लाहकार राजन भट्टराईले सामाजिक सञ्जाल फेसबुकमार्फत जानकारी दिएका छन् ।

भेटमा येचौले चिनियाँ कम्युनिष्ट पार्टीका अध्यक्ष तथा चिनियाँ राष्ट्रपति सि जिङपिङ, महासचिव र चिनियाँ प्रधानमन्त्रीले नयाँ वर्ष २०२१ का लागि दिएको शुभकामना सन्देश पनि सुनाएका थिए। भेटमा उनले दुई देशका कम्युनिष्ट पार्टीको सम्बन्धका बारेमा चर्चा गरेका थिए।

भेटमा दुई देश र दुई कम्युनिष्ट पार्टीबीच लामो समयदेखि परस्पर सम्बन्ध रहेको र आगामी दिनमा पनि जारी रहने बताएको भट्टराईले बताए ।

भेटवार्तामा चिनियाँ टोलीले नेपालले लिएको एक चीन नीतिमा प्रतिबद्ध रहनेमा विश्वस्त रहेको र अहिलेसम्म उक्त प्रतिवद्धता कायम गरेकोमा सरकारलाई धन्यवाद दिएको भट्टराईको भनाइ छ ।

आइतबार चाटर्ड विमानमार्फत नेपाल आएको चिनियाँ टोलीले  आइतबार नै  राष्ट्रपति विद्यादेवी भण्डारीसँग भेट गरेको थियो।

टोलीले आज नेकपाका नेताहरू पुष्पकमल दाहाल ‘प्रचण्ड’ र  माधवकुमार नेपालसँग पनि भेटवार्ता गरेको छ ।