एजेन्सी । इंग्लिस क्लब म्यानचेस्टर सिटीका पूर्व डिफेन्सिभ मिडफिल्डर ग्यारेथ बेरीले फुटबल खेल जीवनबाट सन्यास घोषणा गरेका छन् ।

इंग्ल्यान्डका पूर्व मिडफिल्डर समेत रहेका बेरीले बिहीबार फुटबलबाट सन्यास घोषणा गरेका हुन् ।

३९ वर्षीय बेरीले २२ वर्षको खेल जीवनमा सिटीसँगै एस्टन भिल्ला, एभर्टन र वेस्ट ब्रुमबाट खेलेका थिए ।

एस्टन भिल्लाबाट व्यावसायिक फुटबलको सुरुवात गरेका बेरीले २००९ सम्म भिल्लामा बिताएका थिए । त्यहाँ उनले ३ सय ६५ खेलमा ४१ गोल गरेका थिए ।

बेरीले २००९ देखि १४ सम्म सिटीमा खेलेका थिए । सिटीका लागि १ सय ३२ खेलमा ६ गोल गरेका थिए । सिटीमा रहँदा उनले एक प्रिमियर लिग र एक एफए कप जितेका थिए ।

सिटी छाडेपनि उनी २०१७ सम्म एभर्टनबाट खेलेका थिए । बेरी २०१७ मा वेस्ट ब्रुम आएका थिए ।

गत सिजन उनले वेस्ट ब्रुमबाटै खेलेका थिए । वेस्ट ब्रुमका लागि उनले ५२ खेलमा २ गोल गरेका थिए ।

बेरीले कुल ६ सय ५३ प्रिमियर लिग खेल खेल्दा ५३ गोल गरेका थिए ।

बेरीले इंग्ल्यान्डका लागि ५३ खेलमा ३ गोल गरेका थिए ।