काठमाडौं- विहीबार बिहान स्याङ्जा र नवलपरासीमा गरी थप ४ जनामा कोरोना संक्रमण पुष्टि भएको छ । योसँगै गण्डकी प्रदेशमा कोरोना संक्रमितको संख्या १६ पुगेको छ ।

सामाजिक विकास मन्त्रालय, स्वास्थ्य निर्देशनालय पोखराले जारी गरेको विज्ञप्ति अनुसार विहीबार बिहान थप ४ जनामा कोरोना संक्रमण पुष्टि भएको हो ।

स्वास्थ्य निर्देशनालयका अनुसार नवलपरासी बर्दघाट सुस्ता (पूर्व) का एक जना र गण्डकी प्रदेश, स्याङ्जा जिल्ला वालिङस्थित क्वारेन्टाइनमा रहेका वर्ष २६ र २२ का २ जना पुरुष तथा वर्ष ३९ की १ जना महिला गरी चार जनामा कोरोना पुष्टि भएको छ ।

स्याङ्जामा आज बिहान कोरोना पुष्टि भएका तीन जनालाई सदरमुकामस्थित सरकारी अस्पतालमा ल्याउने तयारी भइरहेको निर्देशनालयले जनाएको छ ।

त्यसैगरी, नवलपरासीका संक्रमितलाई भरतपुरस्थित कोरोना अस्पतालमा लगिएको छ ।