काठमाडौं- प्रदेश २ मा थप ७६ जनामा कोरोना भाइरस (कोभिड–१९) को संक्रमण पुष्टि भएको छ ।

संक्रमण पुष्टि हुने सबैभन्दा बढी धनुषाका छन् ।

राष्ट्रिय जनस्वास्थ्य प्रयोगशाला, टेकु र वीपी कोइराला स्वास्थ्य विज्ञान प्रतिष्ठान धरानमा गरिएको परीक्षणमा ७६ जनामा कोरोना संक्रमण पुष्टि भएको हो ।

संक्रमण पुष्टि हुने धनुषाका २९, महोत्तरीमा १७ , सप्तरीमा १४, सर्लाहीका ७, सिरहाका ६ र रौतहटका ३ जना छन् । हिजो राैतहटका ३५ जनामा कोरोना संक्रमण पुष्टि भएको थियो ।

स्वास्थ्य निर्देशनालय प्रदेश २ का वरिष्ठ जनस्वास्थ्य प्रशासक डाक्टर विजय कुमार झाले प्रदेश २ मा ७६ जना कोरोना संक्रमित थपिएको पुष्टि गरे ।

‘प्रदेश २ मा आज बिहान मात्र ७६ जनाका कोरोना संक्रमित थपिएका छन् । उहाँहरु धनुषाका २९,महोत्तरीमा १७,सप्तरीमा १४, सर्लाहीका ७, सिराहाका ६ र रौतहटका ३ जना हुनुहुन्छ,’ डा झाले खबरहबसँग भने, ‘उहाँहरुको राष्ट्रिय जनस्वास्थ्य प्रयोगशाला टेकु र वीपी कोइराला स्वास्थ्य विज्ञान प्रतिष्ठानमा गरिएको परीक्षणमा कोरोना पोजेटिभ आएको हो ।’

डा झाका अनुसार यो सँगै प्रदेश २ मा मात्र कोरोना संक्रमितको संख्या ४ सय पुगेको छ । जसमध्ये ९७ जना निको भएर घर फर्किएका छन् भने एकजनाको मृत्यु भएको छ ।

यसअघि हिजोमात्र ११४ जनामा कोरोना संक्रमण पुष्टि भएको थियो । हिजै कोरोना संक्रमित एक जनाको निधन भएको थियो ।

बुधबार ललितपुर महानगरपालिका वडा नं. २२ का एक जना पुरुषको कोरोनाका कारण मृत्यु भएको हो । उपचारका क्रममा उनको ललितपुरस्थित किस्ट अस्पतालमा बुधबार निधन भएको हो । उनको निधनसँगै नेपालमा कोरोना संक्रमित पाँच जनाको निधन भएको छ ।