न्युयार्क – हलिउड अभिनेता टम क्रुजको फ्रेन्चाइज मिसन इम्पोसिबलको सातौं र आठौं शृङ्खला कोरोना भाइरसका कारण नयाँ मितिमा रिलिज गर्ने घोषणा गरिएको छ ।

फिल्मको सातौं सिक्वेल यस वर्षको २३ जुलाइमा रिलिज गर्ने घोषणा गरिएको थियो । अब यो फिल्म सन् २०२१ मा पुगेको छ ।

मिसन इम्पोसिबलको आठौं सिरिज सन् २०२२ को ५ अगस्तमा रिलिज गर्ने घोषणा गरिएको थियो । यो फिल्म २०२२ को ४ नोभेम्बरमा रिलिज हुनेछ भने सातौं सिरिज १९ नोभेम्बर २०२१ मा रिलिज गरिने जनाइएको छ ।

फिल्मका अभिनेता टम क्रुज इटलीको भेनिसमा फिल्मको शूटिङका लागि जाने योजनामा थिए । फेब्रुअरीको अन्तिममा शूटिङ समेत स्थगित गरिएको थियो ।

कोरोना भाइरसका कारण ठूला बजेटका प्रायः सबै हलिउड फिल्मले आफ्नो रिलिज मिति सारेका छन् । मार्भलले पनि आफ्ना फिल्मको रिलिज मितिमा हेरफेर गरेको थियो । रिलिजको तयारीमा रहेको फिल्म ‘नो टाइम टु टाइ’ लगायत केही फिल्मले पनि निर्धारित रिलिज मिति स्थगित गरेका छन् ।