काठमाडौं –आज लकडाउनको पाचौं दिन । काठमाडौं लगायत मुलुकका अधिकांश शहरी क्षेत्र सुनसान छन् ।

सरकारले कोरोना भाइरसको सम्भावित जोखिम रोक्न लकडाउन लागू गरेको समयमा उल्लंघन गर्नेहरुलाई नियन्त्रणमा लिइरहेको छ ।

आज बिहानमात्रै काठमाडौं उपत्यकाका विभिन्न स्थानबाट प्रहरीले ४ सय ५२ जना पक्राउ परेका छन् । त्यसैगरि ९६ मोटरसाईकल र चार गाडी समेत नियन्त्रणमा लिएको प्रहरीले जनाएको छ ।

मानिसबाट मानिसमा कोरोनाभाइरसको संक्रमण तीव्रगतिमा सर्ने जोखिमलाई मध्यनजर गर्दै प्रहरीले मेसिनको सहयोगमा सडकमा निस्किनेहरुलाई पक्राउ गर्न थालेको छ ।

लकडाउन उल्लंघन गर्दै मानिसहरु सडकमा निस्किएपछि प्रहरीलाई जोखिम बढेको बेलामा उपत्यकामा मेसिनबाट मानिस समात्न थालिएको हो।

निश्चित शारीरिक दूरी कायम गर्ने गरी मेसिनबाट प्रहरीले मानिस पक्राउ गरिरहेको छ। प्रहरीले यसअघि पञ्जा लगाएर समात्दा पनि थुक वा र्‍यालयबाट कोरोना भाइरस सर्ने जोखिम बढेपछि मेसिनको प्रयोग गरेको हो ।

महानगरीय प्रहरी कार्यालय रानीपोखरीले काठमाडौं उपत्यकाबाट लकडाउनमा सडकमा निस्किने मानिसलाई समात्न यस्ता दुईवटा मेसिनको प्रयोग गरेको हो।

महानगरीय प्रहरी परिसर काठमाडौंका डिएसपी होबिन्द्र बोगटीले यो मेसिनको प्रयोगले निश्चित दूरी कायम गर्ने भएकाले केही सुरक्षित हुने बताए। प्रहरीले आम सर्वसाधारणलाई बिना काम घर बाहिर ननिस्किँन आग्रह गर्दै आएको छ ।