काठमाडौं- विश्व स्वास्थ्य संगठन (डब्लुएचओ)ले नेपाल कोरोना संक्रमणको अति उच्च जोखिममा रहेको जनाएको छ ।

विश्वका विभिन्न देशमा फैलँदोक्रममा रहेको कोरोना भाइरस नेपाल छिर्यो भने भयावह अवस्था निम्त्याउन सक्ने भन्दै डव्लुएचओले  नेपाललाई अति उच्च जोखिमको सूचीमा राखेको जनाएको हो ।

डब्लुएचओले नेपाल लगायत दक्षिण एसियाका भारत श्रीलंका, पाकिस्तान र अगगानिस्तानलाई समेत कोरोना भाइरसको अति उच्च जोखिम भएको देशको सूचीमा राखेको छ ।

कोरोना भाइरस (कोभिड- १९)  संक्रमण हुनसक्ने अति उच्च जोखिमको सूचीमा केही अफ्रिकी देशहरुलाई पनि राखिएको छ ।

यसअघि डव्लुएचओले चीनलाई मात्रै अति उच्च जोखिममा राखेको थियो । नेपालमा अहिलेसम्म शुरुमा एक जना बाहेक कसैलाई संक्रमण देखिएको छैन् ।

नेपालले चीनबाट १ सय ७५ जनालाई उद्धार गरी भक्तपुरको खरीपाटीस्थित क्वारेन्टाइनमा राखेको छ । उनीहरुको स्वास्थ्य परीक्षणमा कोरोनाको संक्रमण नदेखिए पनि अझै केहीदिन क्वारेन्टाइनमै राखेर मात्रै घर जान दिइने छ ।

चीनबाट शुरु भएको कोभिड–१९ अर्थात् कोरोना भाइरसको संक्रमण अहिले विश्वका विभिन्न देशमा फैलिएको छ । एशियाली मुलुकहरुसहित युरोप, अफ्रिका लागायतमा पनि कोरोना भाइरसको प्रकोपमा वृद्धि भइरहेको छ ।

चीनबाहेक दक्षिण कोरिया, थाइल्याण्ड, मलेसिया, सिंगापुर, जापान, इटाली र इरानमा समेत अहिले कोरोना भाइरसको संक्रमण देखिएको छ । चीनपछि दक्षिण कोरियामा कोरोना भाइरसले प्रकोपको रुप नै लिइसकेको छ । कोरोना भाइरसको संक्रमण चीनपछि दक्षिण कोरियामा बढेको विश्व स्वास्थ्य संगठनको भनाइ छ ।

अहिलेसम्म कोरोनाको संक्रमणबाट ज्यान गुमाउनेको संख्या २ हजार ८ सय  पुगेको छ । त्यस्तै विश्वभरका ८३ हजार ८ सय ५३ जन संक्रमित भएका छन् ।