मुम्बई – सुशान्त सिंह राजपूतका पिता केके सिंहले सुशान्तकी प्रेमिका रिया चक्रवर्तीमाथि गम्भीर आरोप लगाएका छन् । उनले रियाले आफ्ना छोरालाई लामो समयदेखि विष खुवाएको आरोप लगाएका हुन् ।

सुशान्तका पिताले रिया आफ्नो छोराको हत्यारा भएको आरोप लगाएका छन् । साथै उनले रियालाई तत्काल पक्राउ गर्न माग गरेका छन् ।

भारतीय टिभी च्यानल जी न्यूजले कुराकानीका क्रममा सुशान्तका पिताले यस्तो आरोप लगाएको लेखेको छ ।

‘रियाले मेरो छोरालाई लामो समयदेखि विष दिइरहेकी थिई, ऊ मेरो छोराकी हत्यारा हो,’ केके सिंहले भनेका छन् ।

हालै खबर आएको छ कि, रियाले ड्रग खरिद गर्ने काम पनि गर्थिन् । जी न्यूजका अनुसार रियाले सुशान्तको चिया, कफी र पानीमा सुशान्तलाई सीबीडी आयल नामक ड्रग्स दिने गर्थिन् । यसबारेमा अनुसन्धान भइरहेको जनाइएको छ ।

सुशान्त केही महिनाअघि मुम्बईस्थित आफ्नो फ्ल्याटमा मृत भेटिएका थिए । उनको मृत्युको कारण के थियो भन्ने पत्ता लगाउन प्रहरीले अनुसन्धान गरिरहेको छ ।