नेपालगञ्ज- बाँकेमा शनिबार २३ जना कोरोना संक्रमणमुक्तभइ अस्पतालबाट डिस्चार्ज भएका छन् । कोरोनामुक्त भएर डिस्चार्ज हुनेहरुमा १८ जना बाँकेका र ५ जना बर्दियाका रहेका छन् ।

जिल्ला स्वास्थ्य कार्यालय बाँकेका कोरोना फोकलपर्शन नरेश श्रेष्ठले दिएको जानकारी अनुसार नेपालगञ्जको आदर्शनगर आइसोलेशन सेन्टरबाट राप्तीसोनारी गाउँपालिकाका १२ जना, कृषि तालिम केन्द्र खजुराको आइसोलेशन सेन्टरबाट खजुराका ३ र सुशील कोइराला प्रखर क्यान्सर कोरोना आइसोलेशन अस्पतालबाट नेपालगञ्जको १, राप्ती सोनरीका २, बर्दियाका ५ गरी ८ जना कोरोनामुक्त भएर डिस्चार्ज भएका हुन् ।

उनले बाँकेका विभिन्न आइसोलेशनमा शनिबारसम्म ४६ जना कोरोना संक्रमित रहेको जानकारी दिए । बाँकेमा हालसम्म ३ सय ५२ जना पुराना संक्रमित रहेको र शनिबार मात्र बाँकेका २ जना थप भएका छन् । यीमध्ये ३ सय २ जना संक्रमणमुक्त भएको र कोरोना संक्रमणको कारण २ जनाले ज्यान गुमाएका छन् ।