स्याङ्जा- स्याङजाका ३४ जना संक्रमितले कोरोना जितेर घर फर्केका छन् ।

योसँगै जिल्लामा कोरोना भाइरस संक्रमण जितेर घर फर्कनेको संख्या ५६ पुगेको छ । भीरकोट स्थित कालिका सामुदायिक अस्पतालको आइशोलेसनमा रहेका ३४ जना संक्रमितले शनिबार एकै दिन कोरोना जितेर घर फर्केका हुन् ।

उनीहरुको दोस्रोपटक गरिएको स्वाव परीक्षण रिपोर्टमा नेगेटिभ आएपछि उनीहरुलाई घर पठाइएको प्रमुख जिल्ला अधिकारी गंगाबहादुर क्षेत्रीले जानकारी दिए ।

अस्पतालमा उपचारत ४१ जना संक्रमितका दोस्रो पटक परीक्षणका लागि नमूना स्वाव पठाइएको थियो । तीमध्ये ३४ जनाको पिसिआर रिपोर्ट नेगेटिभ आएको छ भने बाँकी ७ जनाको भने दोस्रो परीक्षण रिपोर्ट पनि पोजिटिभ नै आएको बताइएको छ ।

घर फर्कनेमा गल्याङ नगरपालिकाका १६ जना, वालिङ नगरपालिकाका १० जना, आँधीखोला गाँउपालिकाका ४ जना, अर्जुनचौपारी गाँउपालिकाका ३ जना र भीरकोट नगरपालिकाका १ जना छन् ।

कोरोनामुक्त भएकालाई, भीरकोट नगर प्रमुख छाँयाराम खनाल, वालिङ नगर प्रमुख दिलिपप्रताप खाँण, आँधीखोला गाउँपालिकाका अध्यक्ष सुधिरकुमार पौडेल, स्वास्थ्य कार्यालयका प्रमुख यामप्रसाद शर्मा लगायतले बिदाइ गरेका थिए ।

कोरोना जितेर घर फर्कनेलाई लिनका लागि सम्बन्धित पालिकाले सवारी साधन पठाएका थिए । जिल्लामा संक्रमितको संख्या १ सय ५९ पुगेको छ । तीमध्ये २ जनाको निधन भएको छ ।