काठमाडौं – एल आकारमा बसेर गफगाफ गर्ने तथा काम गर्दा कोरोना भाइरसको जोखिमबाट जोगिन मद्दत मिल्ने स्वास्थ्य तथा जनसंख्या मन्त्रालयले जनाएको छ ।

कोरोना भाइरस थुकको माध्यमबाट छिटो सर्ने भएकाले एल आकारमा बस्दा छिटा नपर्ने मन्त्रालयको ठहर छ ।
मन्त्रालयले शुक्रबार कोरोना भाइरसका विषयमा गरेको भिडियो कन्फेरन्समा स्वास्थ्यमन्त्री भानुभक्त ढकालका स्वास्थ्य सल्लाहकार डा. खेम कार्कीले एल आकारमा बस्न र कम्तिमा एक मिटरको दूरीमा रहन आग्रह गरेका हुन् ।

‘सबै दाजुभाई तथा दिदिबहिनीहरुलाई मेरो अनुरोध के छ भने कम्तिमा पनि एक मिटरको डिस्टेन्समा बसेर बजारमा जादा पनि सामानहरु किन्दा पनि हरेकले एक मिटरको डिस्टेन्समा बसेर मात्र सामानहरु खरिद गरौं,’ कार्कीले भने, ‘एकअर्काको आम्नेसाम्ने हुने गरी गफ नगरौं, कम्तिमा एल आकारमा बसेर गफ गरियो भने हामी धेरै भन्दा धेरै कोरोना सर्नबाट जोगिन्छौं ।’
रुघाखोकी लागेको छ भने मास्क प्रयोग गर्न पनि उनले आग्रह गरेका छन् ।