काठमाडौं– सरकारका प्रवक्तासमेत रहेका अर्थमन्त्री डा युवराज खतिवडाले सरकारले पुस्तकको व्यापारमा कर लगाउने तर ज्ञानमा कर लगाउने बताएका छन् ।

मन्त्रिपरिषद्ले गरेका निर्णयहरु सार्वजनिक गर्दै विहीवार मन्त्री खतिवडाले पुस्तकको विक्रीमा धेरै मुलकले कर लगाउँने बताए । उनले विश्वका विभिन्न मुलुकमा पुस्तकमा १८ प्रतिशतसम्म कर लगाइने गरिएको उदाहरणसमेत दिए ।

अर्बौं लगानी गरेर नेपालमा प्रेस खुलेका र स्वदेशी उद्योगको संरक्षण गर्नु सरकारको दायित्व भएको उनको भनाइ छ ।

करै नतिरी ल्याउने पुस्तकसँग स्वदेशी पुस्तक उद्योगले प्रतिस्पर्धा गर्नुपर्ने भएको बताउँदै मन्त्री खतिवडाले पुस्तकमा कर लगाउनु परेको बताए । ‘पुस्तकको व्यापार पनि ज्ञानको व्यापारको हो’ उनले भने,‘३५ प्रतिशत नाफा राख्दा १० प्रतिशत कर तिर्नुस् भन्दा ज्ञानलाई पक्डियो भन्ने । यो विषयमा बहस गर्न तयार छौं । हामी व्यापारमा कर लगाउने हो ज्ञानमा कर लगाउने होइन ।’

राष्ट्रिय सभामा फेरि जाने विषयमा बारे सोधिएको प्रश्नमा मन्त्री खतिवडाले यसबारे अहिले नै बहस गर्ने बेला नभएको बताए ।

‘अलि बेला भइसकेको छैन । २१ गते सपथ ग्रहरणको दिन भेट होला नि !’ उनले भने ।

पूर्व सञ्चारमन्त्री गोकुल बाँस्कोटाको अडियो प्रकरणमा अनुसन्धान गर्नुपर्ने निकायले अनुसन्धान गरिरहेको उनले बताए ।

‘अडियो प्रकरणमा पूर्व मन्त्री र अरुको धारणा आएका छन् । अनुसन्धान गर्नुपर्ने निकायल लागि रहनुभएको छ’ उनले भने,‘संवैधानिक र कानूनी विधीबाट हुन दिउँ । कानूनी अधिकार प्राप्त निकायले हेरोस् भन्ने म चाहन्छु ।’