काठमाडौं– नवनिर्वाचित सभामुख अग्नि सापकोटाविरुद्ध परेको रिट निवेदनलाई सर्वोच्चले ‘हेर्दाहेर्दै’मा राखेको छ ।

रिटमाटिथको सुनुवाईका लागि सोमबार न्यायाधीश सपना प्रधान मल्लको इजलाशमा पेशी तोकिएकोमा हेर्दाहेर्दैमा राखिएको हो ।

गत शुक्रबार (माघ १०) वरिष्ठ अधिवक्ता दिनेश त्रिपाठीले सिन्धुपाल्चोक क्षेत्र नम्बर १ का सांसद सापकोटालाई सभामुख निर्विचित गर्ने प्रक्रिया रोक्नका लागि आदेश जारी गर्न मागदाबी गर्दै सर्वोच्च अदालतमा रिट दायर गरेका थिए ।

त्रिपाठीको रिटमाथि सुनुवाईका लागि आइतबार न्यायाधीश हरि प्रसाद फुयालको इजलाशमा पेशी तोकिएकोमा उनले हेर्न नमिल्ने भएपछि सुनुवाई स्थगित भएको थियो ।

प्रधानन्यायाधीश चोलेन्द्र शम्शेर राणाले सोमबार न्यायाधीश मल्लको इजलाशमा पेशी तोकेका थिए ।

तर, सोमबार पनि सुनुवाई नसकिएको सर्वोच्च अदालत स्रोतले जानकारी दियो ।

सापकोटा भने सभामुखमा निर्वाचित भएर पद्भार समेत सम्हालिसकेका छन् ।

आइतबार बसेको प्रतिनिधि सभाको बैठकले सापकोटालाई निर्विरोध रुपमा सभामुखमा निर्वाचित भएको घोषणा गरेको थियो । सोमबार राष्ट्रपति विद्यादेवी भण्डारीबाट पद तथा गोपनीयताको शपथ ग्रहण गरेका सापकोटाले सोमबार नै पद्भार सम्हालिसकेका छन् ।