काठमाडौं – बार्सिलोनाका कप्तान लियोनल मेस्सी र बार्सिलोनाबाट भर्खरै बाहिरिएका लुइस स्वारेजबीच सामाजिक सञ्जाल इन्टाग्राममा भावुक कुराकानी भएको छ ।

मेस्सीले शुक्रबार स्वारेजसँगको फोटो पोष्ट गर्दै उनलाई ‘मिस’ गरिरहेको बताएका थिए । त्यतिमात्रै होइन, मेस्सीले स्वारेजलाई क्लबले त्यसरी अर्को क्लब पठाउन नहुनेसमेत बताएका थिए ।

त्यसको प्रतिक्रियामा स्वारेजले शुक्रबार राति उनकै पोष्टमा प्रतिक्रिया जनाउँदै भावुक बनेका छन् ।

सन् २०१४ देखि अहिलेसम्म गरि ६ वर्ष सँगै एकै मैदानमा खेलेका उनीहरुले एक अर्कासँग टाढा हुँदा निकै भावुक बनेका छन् ।

‘धन्यवाद मित्र, तिम्रा शब्दका लागि । तिमीले तय गरेको मार्गका लागि पनि धन्यवाद, जुन पहिलो दिनदेखि म र मेरो परिवारका लागि तिमीले साथ दियौ,’ मेस्सीलाई प्रतिक्रिया दिँदै स्वारेजले भनेका छन्, ‘म सधै मेस्सीप्रति कृतज्ञ हुनेछु – रमाइलो र भावुक मान्छेका लागि तर, खेलाडीका रुपमा सबैले जान्दछन् ।’

स्वारेजले मेस्सीलाई सम्झाउँदै भनेका छन्, ‘मैले भनेको कुरा नबिर्सनु जुन मैले भनेको छु । आफ्नो जीवन रमाउन नछाड्नु र तिमी एक नम्बर हौ, त्यसलाई कम हुन नदिनु । अन्य कुराहरु होइन तिमी क्लब र विश्व फुटबलका जायन्ट हौ ।’

स्वारेजले आफुले मेस्सीको परिवारका पाँच जना उनी उनकी श्रीमती र तीन छोरोलाई मिस गर्ने बताएका छन् ।

शुक्रबार स्वारेजले एट्लेटिको मड्रिडमा मेडिकल जाँच गर्दै थिए । तर, पनि उनले मेस्सीलाई प्रतिक्रिया दिएका थिए । यसबाट पनि उनीहरुबीचको सम्बन्ध कति नजिक थियो भनेर सहजै अनुमान लगाउन सकिन्छ ।