काठमाडौं – इङ्ग्ल्यान्डका तिव्र गतिका बलर जोफ्रा आर्चरको विश्वकप क्रिकेटको मेडल पछिल्लो पटक घर सार्दा हराएको छ ।

विश्वकप सकिएको एक वर्षपनि नहुँदै आफ्नो मेडल हराएपछि आफू तनावमा रहेको उनले बीबीसी रेडियो फाइभसँगको कुराकानीमा बताएका छन् ।

इग्ल्यान्डले घरमै भएको विश्वकप उपाधी उचाल्दा आर्चर सर्वाधिक विकेट लिने खेलाडी बनेका थिए । उनको नाममा २० विकेट रहेका थियो ।

गत वर्षको जुलाईमा लड्समा भएको विश्वकप फाइनलमा आर्चरले न्यूजिल्यान्डविरुद्ध सुपर ओभरमा बलिङ गरेका थिए।

सुपर ओभरमा अविस्मरणीय प्रर्दशन गर्दै आर्चरले उपाधि घरमै राख्न महत्वपूर्ण योगदान दिएका थिए।

आर्चरलाई नयाँ फ्ल्याटका छिमेकी बारे सोधिएको प्रश्नमा उनले आफ्नो मेडल हराएको खुलासा गरेका हुन्।

`मलाई कसैले तनाव दिइरहेको छ। मेरो विश्वकप मेडले मलाई तनाव दिइरहेको छ। म नयाँ फ्ल्याटमा सारेको थिए र नयाँ फ्ल्याटको तस्बिरमा मेडल देखिन्छ तर, अहिले मेडल गायव भएको छ।´

आर्चरले एक हप्तादेखि मेडल खोजिरहेको बताउँदै अहिलेसम्म नभेटिको बताएका छन्।

`मलाई थाहा छ यो घरभित्रै हुनु पर्छ तर, खोज्दा खोज्दा पागल भइसके तर, पनि भेट्न सकेको छैन,´ आर्चरले भने।

अघिल्लो महिना बार्बाडोसबाट आएका आर्चर लकडाउनको समयमा इङ्ग्यान्डमा बसिरहेको बताएका छन्। मेडल नपाए सम्म खोजिरहने पनि २५ वर्षे आर्चरले बताए ।