जनकपुरधाम– प्रेमीसँग मिलेर आफ्नै श्रीमान्‌को हत्या गर्ने महिलालाई प्रहरीले पक्राउ गरेको छ ।

पक्राउ पर्नेमा धनुषाको शहीदनगर नगरपालिका–३ दीवारथान घर भएकी कोशिला देवी छन् ।

प्रहरीका अनुसार कोशिलाले आफ्ना प्रेमी राकेश कुमार मण्डलसँग मिलेर पति राजकिशोर मण्डलको हत्या गरेकी थिइन् । उनले गत फागुन २८ गते पति राजकिशोरको हत्या गरेको जिल्ला प्रहरी कार्यालय धनुषाले जनाएको छ ।

प्रहरीका अनुसार प्रेमी राकेशकै सल्लाहमा कोशिलाले पति राजकिशोरलाई खानामा बिष मिलाएर खुवाएकी थिइन् । बिष मिलाइएको खाना खाएपछि सुतेका राजकिशोर सुतेकै अवस्थामा बेहोस भएका थिए ।

पति राजकिशोर बेहोस भएपछि कोशिलाले प्रेमी राकेशलाई बोलाएकी थिइन् । पछि दुवै जनाले बहोस भएका राजकिशोरलाई घर बाहिरको कल धारामा रहेको कङ्क्रिट (इट्टा) ल्याइ मुख र टाउकोमा प्रहार गरी हत्या गरेका थिए ।

राजेशको हत्या भएकै राति घटनास्थलमा पुगेको प्रहरीले कोशिलालाई उनकै घरबाट पक्राउ गरेको थियो । राकेशलाई भने कोशिलाको बयानको आधारमा धनुषाको शहीदनगर–७ स्थित उनको घरबाट नियन्त्रणमा लिएको हो ।

प्रहरीसँगको (साबिती) बयानका क्रममा दुवै जनाले ‘प्रेम जोगाउन’का लागि भनेर योजना बनाएर राजकिशोरको हत्या गरेको स्वीकार गरेका छन् ।

प्रहरीले पक्राउ परेका दुवै जनालाई कर्तव्य ज्यान शीर्षकमा मुद्दा दर्ता गरी अनुसन्धान प्रक्रिया अगाडि बढाएको छ ।