सुनसरी- धरानको बीपी कोइराला स्वास्थ्य विज्ञान प्रतिष्ठानको प्रयोगशालामा कोरोना भाइरस परीक्षण हुने भएको छ । प्रदेश सरकारले भारतबाट कोरोना भाइरस परीक्षण गर्ने रसायन ल्याएपछि परीक्षण सम्भव हुने भएको हो ।

टेकुमा रहेको शुक्रराज ट्रपिकल हस्पिटलमा मात्र यसको परीक्षण हुने भएकोले हवाईजहाज बन्द भएपछि एम्बुलेन्स तथा गाडीको सहायताबाट स्वाब परीक्षण गर्न काठमाडौँ लानुपर्ने बाध्यता थियो । सामाजिक विकासमन्त्री जीवन घिमिरेको अग्रसरतामा प्रदेश सरकारले केमिकल ल्याएको हो ।

विश्वमै कोरोना भाइरस परीक्षण गर्ने रसायनको अभाव भएको अवस्थामा लगभग १ हजार ५ सय जनालाई पुग्ने रसायन ल्याइएको सामाजिक विकास मन्त्रालयले जनाएको छ ।

ल्याइएको रसायन बिपी कोइराला स्वास्थ्य विज्ञान प्रतिष्ठान धरानलाई बुझाइएको छ।

केन्द्रीय प्रयोगशालासँग समन्वय गरेर दुई दिनभित्र नै बीपी कोइराला स्वास्थ्य विज्ञान प्रतिष्ठानबाट कोरोना भाइरस ल्याव परीक्षण सुरु हुने सामाजिक विकासमन्त्री जीवन घिमिरेले जानकारी दिए ।