काठमाडौं – नेपाली क्रिकेटका पूर्व प्रशिक्षक पुबुदु दासानायके नेपाल आउने भएका छन् ।

एभरेष्ट प्रिमियर लिग (ईपीएल) टीम भैरहवा ग्लाडियटर्सको प्रशिक्षक समेत रहेका दासानायके आउँदो आइतबार काठमाडौं आइपुग्ने भएका हुन् । नेपाली क्रिकेट साइट क्रिकेटिङ्ग नेपालका अनुसार उनको नेपाल बसाइ लामो समय रहने छ ।

कीर्तिपुरस्थित टियू क्रिकेट मैदानमा चैत १ देखि १५६ गतेसम्म हुने ईपीएलमा उनले भैरहवा ग्लाडियटर्सको प्रशिक्षकको भूमिकामा रहनेछन् ।

राष्ट्रिय टोलीका अनुभवी खेलाडी शरद भेषावकर कप्तान रहेको भैरहवाले यसअघिका दुई संस्करणको उपाधि उचालिसकेको छ ।

पुबुदुले आफू नेपाल आउनका लागि उत्साहित रहेको जनाएको क्रिकेटिङ्ग नेपालले उल्लेख गरेको छ ।

उनले नेपाललाई सन् २०१४ मा बंङ्गलादेशमा सम्पन्न आईसिसि टी– २० विश्वकपसम्म पुर्याएका थिए ।

सन् २०१० को अन्त्यतिर पुबुदु पहिलो पटक नेपाली टोलीको प्रशिक्षकका रुपमा काठमाडौं आएका थिए । उनले नेपाललाई बिश्व क्रिकेट लिग अन्तर्गत डिभिजन ४ देखि डिभिजन १ सम्म पुर्याउन महत्वपूर्ण भुमिका खेलेका थिए ।

पुबुदुले पछिल्लो समय अमेरिकी क्रिकेट टोलीको मुख्य प्रशिक्षकको भूमिकामा थिए । तर, गएको जुलाईमा अमेरिकाको प्रशिक्षक पदबाट राजिनामा दिएपछि उनी ईपीएल टोली भैरहवाको प्रशिक्षकमा आवद्ध भएका थिए ।