काठमाडौं- साझा पार्टीले शनिबार राजधानीमा तराजु यात्रा निकालेकाे छ।

साझाले विभिन्न घटनामा पीडित भएकाहरुलाई नाय दिलाउनुपर्ने मागसहित तराजु यात्रा निकालेको हो ।

सर्वोच्च अदालतको पछिल्लो फैसलाले कानूनी राज्यको उपहास भएको पार्टीले जनाएको छ ।

फैसलाको विरुद्धमा साझा पार्टीका नेता तथा कार्यकर्ताहरुले न्यायको प्रतीक तराजुसहित माइतीघर नजिक सडकमा लम्पसार सुतेर विरोध जनाए ।

सशस्त्र प्रहरी बलका पूर्वनायब महानिरीक्षक रञ्जन कोइरालाले पत्नी गीता ढकालको हत्या गरेको ठहर गर्दै जिल्ला अदालत र उच्च अदालतको जन्मकैद गर्ने फैसला सर्वोच्च अदालतले उल्टाएर दण्ड सजाय घटाएकोमा विरोध प्रदर्शन गरिएको थियो ।

विराेध प्रदर्शनमा उनीहरुले  रुकुम नरसंहारका दाेषीलाई कारबाही गर, पीडितलाई न्याय गर, भ्रष्टलाई सिंहदरबार हाेइन जेल हालाैं, निर्मलाहरुलाई न्याय दे, गैरन्यायिक फैसला चाहिँदैन दाेषीलाई उम्काउन पाइँदैन लेखिएका प्लेकार्डसहित प्रदर्शनमा उत्रिएका थिए ।

पार्टीले न्यायका लागि साझा यात्रा नाम दिएर उक्त विरोधको अभियान शुरु गरेको जनाएको छ ।

यसअघि उक्त पार्टीले न्यायालयको समग्र सुधारको माग गर्दै ललितपुरको बखुण्डोलस्थित पार्टी कार्यालयबाट माइतीघर मण्डलासम्म साझा तराजु यात्रा आयोजना गरेको थियो ।

कार्यक्रममा प्रदेश नं ३ का सदस्य शोभा शाक्य र संयोजक रवीन्द्र मिश्र, नेतृ समीक्षा सापकोटालगायत उपस्थित भएका थिए ।

साझाको विरोध हेरौं भिडियो