भक्तपुर- भक्तपुरमा गत बिहीबार (जेठ ७ गते) भक्तपुर नगरपालिका वडा नं. ५ का कोरोना संक्रमण पुष्टि भएका व्यक्तिको सम्पर्कमा रहेका १२ जनाको रिपोर्ट नेगेटिभ आएको छ ।

४२ वर्षीय संक्रमित पुरुषका परिवारका ११ सहित १२ जनाको कन्ट्राक्ट ट्रेसिङको आधारमा कोरोना परीक्षणका लागि स्वाब संकलन गरी राष्ट्रिय जनस्वास्थ्य प्रयोगशालामा पठाइएको थियो । उनीहरु १२ जनाकै रिपोर्टमा कोरोना नदेखिएको महानगरीय प्रहरी परिषर भक्तपुरका प्रमुख एसपी सविन प्रधानले जानकारी दिए । कोरोना संक्रमित पुरुषको काठमाडौँको बलम्वुस्थित सशस्त्र प्रहरी बलको अस्पतालमा उपचार भइरहको छ ।

त्यसैगरी कोरोना संक्रमणका कारण मृत्यु भएकी सिन्धुपाल्चोक बाह्रबिसेकी सुत्केरी महिलाको शव व्यवस्थपनमा खटिएका भक्तपुरका दुई युवकमा पनि कोराना देखिएन । भक्तपुरका अरुण सैँजु र राजेश गाइजुको कोरोना रिपार्ट नेगेटिभ आएको एसपी प्रधानले जनाकारी दिए ।

उनीहरुलाइ अहिले सुर्यविनायकस्थित वीरदल गणको क्वारेन्टाइनमा राखिएको छ । उनीहरुले धुलिखेल अस्पतालबाट कोरोना संक्रमणका कारण मृत्यु भएकी महिलाको लास पशुपतिस्थित आर्यघाटमा लगेर व्यवस्थापन गरेका थिए ।