काठमाडौं- कोरोना भाइरस संक्रमितको उपचारमा खटिएका एक डाक्टरको मृत्यु भएको छ । योसँगै चीनमा कोरोना भाइरसको संक्रमणमा परी ज्यान गुमाउनेको संख्या ४२ पुगेको छ ।

हुबेई सिन्ह्वा अस्पतालमा कार्यरत ६२ वर्षीय डा. लियाङ वुदोङको कोरोना भाइरसकै कारण मृत्यु भएको चिनियाँ सञ्चार माध्यम चाइना ग्लोबल टेलिभिज नेटवर्कले जनाएको छ ।

कोरोना भाइरसको संक्रमणबाट डाक्टरकै मृत्यु भएको यो पहिलो घटना भएको टेलिभिजनले जनाएको छ । डाक्टर लियाङ कोरोना भाइरसको प्रकोप नियन्त्रणका लागि अग्रपंक्तिमा रहेर खटिएका चिकित्सक रहेको चिनियाँ सञ्चार माध्यमलले जनाएका छन् ।

अहिलेसम्म चीनमा मात्रै कोरोना भाइरसको संक्रमणमा परी ४२ जनाले ज्यान गुमाएका छन् भने एक हजार दुई सय भन्दा बढीमा यसको संक्रमण भएको चीनको राष्ट्रिय स्वास्थ्य आयोगले जनाएको छ ।

‘नोवल कोरोना भाइरस’ को संक्रमण नेपालमा पनि देखापरेको छ। चीनको वुहानबाट बिदामा नेपाल आएका विद्यार्थीको रगत र र्‍यालको नमुना परीक्षण गर्दा भाइरसको संक्रमण पुष्टि भएको हो।

नमुना विशेष परीक्षणका लागि गत मंगलबार विश्व स्वास्थ्य संगठन (डब्लूएचओ) कोलाबरेटिङ सेन्टर हङकङ पठाइएको थियो। नोवल कोरोना भाइरसको परीक्षण सेवा नेपालमा उपलब्ध छैन। थप नेपालीमा पनि कोरोनाको संक्रमण फैलिएको आशंका गरिएको छ ।

चीनको हुबेई प्रान्तको वुहान शहरबाट शुरु भएको कोरोना भाइरसको जोखिम चीनका अन्य प्रान्त र शहरलगायत विश्वका विभिन्न देशमा समेत फैलिएको छ । कोरोना भाइरसको संक्रमण अमेरिका, जापान, थाइल्याण्ड, दक्षिण कोरिया, अस्ट्रेलियामा समेत पुगेको छ ।