मोरङ- मोरङका अलग-अलग स्थानमा भएका दुर्घटनामा दुई जनाको मृत्यु भएको छ ।
बेलबारी, पथरीशनिश्चरे र उर्लाबारीमा सोमबार साँझ भएका दुर्घटनामा अरू पाँच जना घाइते भएका छन् । तीन जनाको अवस्था गम्भीर छ ।
पूर्व–पश्चिम राजमार्ग अन्तर्गत बेलबारी नगरपालिका–४ मा दुईवटा मोटरसाइकल साँझ साढे ५ बजेतिर ठोक्किएर दुर्घटना हुँदा बेलबारी–७ का ३७ वर्षीय नवीन पौडेलको मृत्यु भएको प्रहरीले जनाएको छ ।
पूर्वबाट पश्चिमतर्फ आउँदै गरेको प्रदेश १ –०२–०४२ प ४२१६ नम्बर र विपरीत दिशाबाट आउँदै गरेको को ३९ प ३८०१ नम्बरको मोटरसाइकल ठोक्किएर दुर्घटना भएको हो ।
इलाका प्रहरी कार्यालय बेलबारीका प्रहरी निरीक्षक ऋषिराज ढकालका अनुसार मृतक पौडेल को ३९ प ३८०१ नम्बरको मोटरसाइकलका चालक हुन् । दुर्घटनामा गम्भीर घाइते भएका उनको उपचारका क्रममा साँझ ७:१० बजे विराटनगरको न्युरो अस्पतालमा मृत्यु भएको जानकारी ढकालले दिए ।
दुर्घटनामा परेर पौडेलले चलाएको मोटरसाइकलको पछाडि बसेका २६ वर्षीय मनोज विष्ट घाइते भएका छन् । हात र खुट्टामा चोट लागेका उनको बेलबारी सामुदायिक अस्पतालमा उपचार भइरहेको छ ।
दुर्घटनामा अर्को मोटरसाइकलका चालक सुनसरीको धरान उपमहानगरपालिका–१७ का २० वर्षीय प्रमोद राई र पछाडि सवार २१ वर्षीय विपिन श्रेष्ठ गम्भीर घाइते भएका छन् ।
दुवै जनाको बीपी कोइराला स्वास्थ्य विज्ञान प्रतिष्ठान धरानमा उपचार भइरहेको ढकालले बताए ।
यस्तै पथरीशनिश्चरे नगरपालिका–२ जय चोकस्थित पूर्व–पश्चिम राजमार्गमा यात्रुबहाक बसको ठक्करबाट मोटरसाइकल चालकको मृत्यु भएको छ ।
पश्चिमबाट पूर्वतर्फ जाँदै गरेको मे ८ प ६३७७ नम्बरको मोटरसाइकललाई विपरीत दिशाबाट आउँदै गरेको को १ ख ६८३१ नम्बरको बसले साँझ ६:४० बजेतिर ठक्कर दिँदा दुर्घटना भएको हो ।
दुर्घटनामा मोटरसाइकल चालक झापाको मेचीनगर नगरपालिका–९ का ३२ वर्षीय मुकेशप्रसाद पौडेलको मृत्यु भएको इलाका प्रहरी कार्यालय पथरीका डीएसपी दिलिप गिरीले बताए ।
दुर्घटनामा परेर गम्भीर घाइते उनको पथरी अस्पतालमा साँझ नै मृत्यु भएको गिरीले बताए ।
मोरङको उर्लाबारी नगरपालिका–८ स्थित भित्री सडक खण्डमा पनि दुर्घटना भएको छ ।
नम्बर नखुलेको अटो टेम्पोले दक्षिणतर्फ जाँदै गरेको को १२ प १२५१ नम्बरको मोटरसाइकललाई ठक्कर दिँदा दुई जना घाइते भएका छन् ।
दुर्घटनामा मोटरसाइकल चालक मोरङको रतुवामाई नगरपालिका–५ का ३५ वर्षीय भोजकुमार खड्का र पछाडि सवार ३४ वर्षीय प्रकाश माझी घाइते भएका छन् । घाइतेमध्ये खड्काको अवस्था गम्भीर छ ।
प्रतिक्रिया