काठमाडौं – ओझेलमा परेका कथा भन्न रुचाउने निर्देशन दीपेन्द्र के खनाालले हालै फिल्म ‘चिसो मान्छे’ निर्माणको घोषणा गरेका छन् । फिल्ममा खनालको लेखन तथा निर्देशन रहनेछ ।

शर्मिला पाण्डेले निर्माण गर्ने यो फिल्मको यतिबेला स्क्रिप्टमा काम भइरहेको छ । फिल्मलाई सुदूरपश्चिमका विभिन्न भेगमा छायांकन गरिने जनाइएको छ ।

फिल्ममा सुदूरपश्चिम भेगको परिवेश र लबज प्रयोग गर्नुपर्ने भएकाले थप तयारी गर्नुपर्ने निर्माण टिमले बताएको छ ।

अहिलेसम्म फिल्ममा कलाकार को हुने भन्ने अझै तय भएको छैन । यद्यपि फिल्ममा स्वस्तिमा खड्का चयन भइसकेको खबर छ ।

स्रोतका अनुसार फिल्मको शीर्ष भूमिकाका लागि स्वस्तिमासँग एक चरणको कुराकानी भइसकेको छ । स्वस्तिमाले पनि फिल्मप्रति चासो देखाएको बताइएको छ ।

लकडाउनका कारण स्वस्तिमासँगको छलफल अझै टुंगोमा पुगेको छैन ।

स्वस्तिमाले फिल्म ‘बुलबुल’ बाट चौतर्फी तारिफ कमाएकी थिइन् । उक्त फिल्मपछि उनले अभिनय गरेका कुनै पनि फिल्मले सोचेजस्तो सफलता हात पार्न सकेनन् ।

दीपेन्द्र नेपालका राम्रा निर्देशकमध्ये गनिन्छन् । ‘चिसो मान्छे’ स्वस्तिमाको काम कस्तो हुनेछ, त्यो भने हेर्न बाँकी छ । यो फिल्मको आगामी वर्ष भदौ ११ गतेलाई रिलिज मिति तोकिएको छ ।