काठमाडौं – आज (बुधवार) देखि नेपालमा लगातार झरी पर्ने सम्भावना रहेको मौसमविद्हरूले जनाएका छन् ।

मौसम पूर्वानुमान महाशाखाका अनुसार बंगालको खाडीबाट बढी मात्रामा जलवाष्पयुक्त हावा भित्रिन थालेका कारण नेपालमा मनसुनको नयाँ प्रणाली शुरु भएको छ ।

बंगालको खाडीबाट नेपालको पूर्वी क्षेत्रबाट भित्रिरहेको र मनसुनको न्यूनचापीय रेखा बनेको छ । पूर्वका झापा, मोरङ, सुनसरी, धनकुटा लगायतका क्षेत्रमा निरन्तर झरी पर्न सक्ने बताइएको छ ।

केही दिनदेखि नेपालका धेरै स्थानमा पानी परिरहेको छ । मौसम पूर्वानुमान महाशाखाले बुधवार पनि बिहानैदेखि पानी पर्न सक्ने बताएको छ ।

महाशाखाका अनुसार देशका धेरै स्थानमा हल्का र मध्यम वर्ष हुनसक्ने छ । महाशाखाले गण्डकी प्रदेश, कर्णाली प्रदेश, प्रदेश १, र प्रदेश २ मा भारी वर्षा हुनसक्ने भन्दै शतर्कता अपनाउन अनुरोध गरेको छ ।

महाशाखाका अनुसार बिहीवार प्रदेश १ र प्रदेश २ मा भारी वर्षा हुनसक्ने छ भने प्रदेश ५ का केही स्थानमा पनि भारी वर्षाको सम्भावना छ ।

यस्तै शुक्रवार पनि देशभर हल्कादेखि मध्यम वर्षा हुनसक्ने महाशाखाले जनाएको छ ।