काठमाडौं– आइतबार कोरोना संक्रमण पुष्टि भएका काठमाडौं महानगरपालिका वडा नम्बर-१६ सोह्रखुट्टेका संक्रमित चैत ३ गते अष्ट्रेलियाबाट नेपाल आएको खुलेको छ ।

नगरपालिकाका वडा नम्बर १६ का वडा अध्यक्ष मुकुन्द रिजालका अनुसार ६९ वर्षका ती वृद्ध पुरुष चैत ३ गते नेपाल आएका थिए ।

वडा अध्यक्ष रिजालका अनुसार उनी चैत महिलामा विदेशबाट आएको खुलेको जानकारी पाएपछि वडा कार्यालयले उनलाई केही दिन अघि नै कोरोना परीक्षण गर्न सुझाएको थियो ।

वडा कार्यालयले ती वृद्धसँगै उनका परिवारलाई समेत कोरोना परीक्षण गर्न पठाएको थियो । परीक्षणको क्रममा ती वृद्ध पुरुषमा कोरोना संक्रमण देखिएको वडा अध्यक्ष रिजालको भनाइ छ ।

उनले भने, ‘उहाँ चैत ३ गते अष्ट्रेलियाबाट आउनु भएको जानकारी आएपछि हामीले केही दिन अघि टेकुमा कोरोना परीक्षण गर्न पठाएका थियौं, उहाँको रिपोर्ट ढिला आयो, कोरोना पुष्टि भएपछि उहाँलाई कोरोना अस्पतालमा लगिएको छ ।’

परिवारका अन्य सदस्यहरुमा भने संक्रमण नदेखिएको वडा अध्यक्ष रिजालले जानकारी दिए । स्वास्थ्य मन्त्रालयले नियमित लाइभ अपडेटमा आज (आइतबार) काठमाडौंका– १६ का ती पुरुषमा कोरोना संक्रमण भएको पुष्टि गरेको थियो ।

स्वास्थ्य मन्त्रालयका प्रवक्ता डा विकास देवकोटाले ती पुरुष सोह्रखुट्टेका भएको बताए पनि वडा अध्यक्ष रिजालले भने ती संक्रमित पुरुष कलधाराका स्थानीय पुरुष भएको बताएका छन् ।