काठमाडौं- बागलुङकी कोरोना संक्रमित १९ वर्षीया युवती अन्सु सापकोटा आत्मविश्वास बलियो बनाएर धर्यता अपनाउँदा कोरोनाविरुद्धको लडाइँ जित्न सकिने बताएकी छिन् ।

शुक्रबार राति अस्पतालबाट डिस्चार्ज भएकी उनले काेराेना जित्नुमा आत्मविश्वास, धैर्यता र सन्तुलित खाना भएकाे अनुभव सुनाएकी छिन् ।

उनले भनिन्, ‘आत्मबल नै सबैभन्दा ठूलो औषधी रहेछ, हिम्मत नहारे कोरोनालाई जित्न सकिन्छ ।’

उनी बागलुङको पहिलो संक्रमित तथा नेपालको पाँचौ संक्रमित हुन् । धौलागिरी अञ्चल अस्पतालको आईसोलेसनमा उपचाररत गराइरहेकी उनको छैठौं पटक गरिएको थ्रोट स्वाव परीक्षणको नतिजा नेगेटिभ आएसँगै अस्पतालले आज डिस्चार्ज गरेको हो ।

लगातार दुई पटक (पाँचौ र छैठौं) रिपोर्ट नेगेटिभ आएपछि कोरोना संक्रमण निको भएको धौलागिरी अञ्चल अस्पतालले जनाएको छ ।

चैत ४ गते बेल्जियमबाट कतारको दोहा ट्रान्जिट भएर नेपाल आएकी उनलाई चैत १५ गते कोरोना संक्रमण रहेको पुष्टि भएको थियो । उनी अस्पतालबाट डिस्चार्ज भएसँगै नेपालमा कोरोना विरुद्धको लडाइँ जित्नेको संख्या ११ पुगेको छ ।

यस अघि उनीसँगै बेल्जियमबाट आएकी बागलुङ नगरपालिका–३ गौडाकोटकी ६५ बर्षिय मनकुमारी पौडेलले कोरोनालाई जितेर ६ बैशाखमा घर फर्किएकी थिइन।