काठमाडौं- च्याम्पियन्स लिग फुटबलको उपाधिका लागि आज जर्मन च्याम्पियन बार्यन म्युनिख र फ्रेन्च च्याम्पियन पेरिस सेन्ट जर्मेन (पीएसजी) बीच प्रतिस्पर्धा हुँदैछ ।

नेपाली समय अनुसार राति पौने एक बजे हुने खेलमा जर्मन जाइन्ट बार्यन च्याम्पियन्स लिगको उपाधि जितेर यो सिजनको सुखद अन्त्य गर्न चाहन्छ । यदि च्याम्पियन्स लिगको उपाधि जितेमा बार्यनको यो सिजनको तेस्रो उपाधि हुनेछ ।

बार्यनले बुन्डेसलिगाका साथै जर्मन कपको पनि उपाधि जितेको थियो । बार्यन ६ बर्षपछि च्याम्पियन्स लिगको फाइनलमा पुगेको हो ।

यस्तै पीएसजी भने पहिलो पटक च्याम्पियन्स लिगको उपाधि यात्रामा रहेको छ । पीएसजीका प्रशिक्षक थोमस टुचेलले बार्यन पीएसजी भन्दा धेरै पटक फाइनलमा पुगेकाले त्यो अनुभव उसका लागि फाइदाजनक हुने बताएका छन् ।

बार्यन र पीएसजी यसअघि आठ पटक खेलेका छन । जसमा पीएसजीले पाँच पटक र बार्यनले तीन पटक खेल जितेको छ ।