दिल्ली– भारतीय प्रधानमन्त्री नरेन्द्र मोदीले कोरोना भाइरसलाई गम्भीरतापूर्वक लिन भारतीयहरुसमक्ष आह्वान गरेका छन् ।

ट्वीटरमार्फत् सन्देश जारी गर्दै प्रधानमन्त्री मोदीले भारतीयहरुसमक्ष घरभित्रै बसेर आफैंलाई जोगाउन समेत आग्रह गरे । भारतीयहरुले सरकारी निर्देशनको गम्भीरतापूर्वक नलिएको भन्दै यस्ता निर्देशनहरु पालना गर्न आह्वान गरे ।

मोदीले कोरोना भाइरसको रोकथामका लागि आइतबार जनता कफ्र्यू समेत लागू गरेका थिए । कोरोना भाइरसको रोकथामकै लागि राजधानी नयाँ दिल्ली सहित विभिन्न राज्यका ७५ जिल्लामा तालाबन्दी गरिएको छ ।

भारतमा हालसम्म ४१५ जनामा कोरोना भाइरसको संक्रमण देखिएको छ भने ७ जनाको मृत्यु भइसकेको छ । यद्यपि १ अर्ब ३० करोड भन्दा धेरै जनसंख्या रहेको भारतमा कोरोना भाइरसले ठूलो स्वास्थ्य प्रकोपको रुप लिने चिन्ता उत्पन्न हुँदै आएका छन् ।

कमजोर स्वास्थ्य सेवा रहेका कारण पनि त्यस किसिमको स्वास्थ्य प्रकोपप्रति चिन्ता व्यक्त गर्न थालिएको छ ।