काठमाडौं– कोरोना भाइरस (कोभिड–१९) संक्रमणको जोखिमलाई मध्यनजर गर्दै सरकारले आज (सोमबार)देखि देशभर लामो दूरीका सर्वजनिक सवारीसाधन सञ्चालनमा पूर्ण रोक लगाएको छ ।

छोटो दूरीका सार्वजनिक सवारी सञ्चालनमा कुनै रोक नभए पनि ट्राफिक प्रहरीले विशेष कडाइका साथ चेकजाँच र निगरानी शुरु गरेको छ ।

महानगरीय ट्राफिक महाशाखाका प्रमुख प्रहरी वरिष्ठ उपरीक्षक (एसएसपी) भीम ढकालका अनुसार अहिले काठमाडौं उपत्यकामा फाट्ट–फुट्ट मात्रामा मात्रै सार्वजनिक सवारीका साधन चलेका छन् । यस्तै, निजी सवारी साधन पनि कम मात्रै चलेका छन् ।

‘सरकारले नै जरुरी काम बाहेक अन्य कामका लागि बाहिर ननिस्किन भनिसकेको छ । धेरै हदसम्म अहिले सडकमा ट्राफिक चाप कम भएको छ,’ एसएसपी ढकालले भने, ‘हामीले अहिले छोटो दूरीका सार्वजनिक सवारी साधनमाथि चेकजाँच र निगरानी बढाएका छौं । चालक, सहचालकले अनिवार्य रुपमा मास्क लगाउनुपर्ने, आफ्नो प्रयोजनका लागि ह्याण्ड सेनिटाइजर प्रयोग गर्नुपर्ने तथा यात्रुहरुले पनि मास्क प्रयोग गर्नुपर्ने भनेका छौं ।’

उपत्यकाका ८ नाकामा कडाइ

ट्राफिक प्रहरीले काठमाडौं उपत्यका भित्रिने सवारी साधनमाथि पनि विशेष निगरानी शुरु गरेको छ ।

लामो दूरीका सार्वजनिक सवारीका साधनमा रोक लगाइए पनि निजी ४ पाङ्ग्रे तथा दुई पाङ्ग्रे सवारीका साधनहरु भने चलि नै रहेका छन् ।

यद्यपि, ट्राफिक प्रहरीले काठमाडौं भित्रिने सवारीका साधनमा भने विशेष निगरानी शुरु गरेको जनाएको छ ।

‘काठमाडौं भित्रिने अत्यावश्यक सेवा बाहेकका अन्य सवारी साधनलाई हामीले चेकजाँच गरेर उपयुक्त देखिएमा मात्रै प्रवेश गर्न दिएका छौं,’ ट्राफिक महाशाखा प्रमुख एसएसपी ढकालले भने, ‘हामीले उपत्यका भित्रिनै सबै ८ वटा नाकामा चेकजाँचमा कडाइ गरेका छौं । अत्यावश्यक बाहेक अन्य कामका लागि आउने सवारीलाई सकभर हामी काठमाडौं प्रवेश नगर्न भनिरहेका छौं ।’