सोलुखुम्बु- सोलुखुम्बुमा पटक-पटक उडिरहेको हेलिकोप्टरबाट निर्माण सामग्री लगायतका वस्तुहरु खस्न थालेपछि स्थानीयले हवाइ उडानका कारण आफूहरु असुरक्षित भएको जनाएका छन् ।

उनीहरुले  यसबारे प्रहरी प्रशासनसँग गुहार मागेको भए पनि कुनै सुनुवाई नभएको बताए ।

पछिल्लो पटक शनिबार मात्र खुम्बु पासाङ ल्हामु गाउँपालिका ४ दिङ्बुचेका लागि कार्गोसहित उडेको हेलिकोप्टरबाट जस्तापाता लगायतका निर्माण सामग्री खसेका थिए ।

यसअघि गत भदौ १९ गते उडिरहेको कैलास एअरको हेलिकोप्टरबाट सोलुदूधकुण्ड नगरपालिका २ को फेरामा सिरक लगायतका सामग्री खसेका थिए ।

शनिबार बिहान साढे १० बजे सोलुदूधकुण्ड नगरपालिका १ को लुङ्दिङ खोलाकाे जङ्गलमा २ रोल म्याटिस र इको प्यानलको ३१ थान जस्तापाता खसेको प्रहरीले जनाएको छ ।

जस्तापाता लगायतका निर्माण सामग्री लिएर उडिरहेको हेलिकोप्टरबाट केही जस्तापाता लगायतका सामग्री जंगलमा खसेका कारण कुनै मानवीय क्षति नभएको प्रहरी निरीक्षक (इन्स्पेक्टर) महेन्द्र दर्नालले जनाए ।

कैलाश एअरको ९ एनएएमटीको हेलिकोप्टर दिङ्बुचेका लागि निर्माण सामाग्री लिएर टाक्सीन्दुबाट उडेको थियो ।

सोलुखुम्बुका प्रमुख जिल्ला अधिकारी रमा आचार्यले घटना गम्भीर भएको भन्दै प्रहरीको स्थलगत रिपोर्टपछि आवश्यक कारबाहीका लागि पहल गरिने जानकारी दिइन् ।