काठमाडौं- स्पेनिस ला लिगा अन्तर्गत शनिवार राति भएको खेलमा आइबरविरुद्ध बार्सिलोनाले शानदार जित हात पारेको छ ।

कप्तान लिओनल मेसीले चार गोल गरेपछि साविक विजेता बार्सिलोना आइबरविरुद्ध ५-० गोल अन्तरले विजयी भएको हो ।

पहिलो हाफमा ह्याट्रिक गरेका कप्तान मेसीले दोस्रो हाफमा थप एक गोल गरेका थिए । अर्को गोल आर्थर मेलोले गरे ।

जितपछि बार्सिलोना रियल मड्रिडलाई पछि पार्दै शीर्ष स्थानमा उक्लेको छ । २५ खेलबाट बार्सिलोनाको ५५ अंक हुँदा एक खेल कम खेलेको रियलको ५३ अंक छ ।

घरेलु मैदान नोउक्याम्पमा भएको खेलमा मेसीले २६ मिनेटमा ह्याट्रिक गरे । खेलको १४ औं मिनेटमा पहिलो गोल गरेका मेसीले ३७औं मिनेटमा अग्रता दोब्बर पारे । त्यसको तीन मिनेटपछि नै गोल गर्दै मेसीले ह्याट्रिक पूरा गरे ।

दोस्रो हाफमा बार्सिलोनाले दुई गोल गर्दा मेसीले एक गोल थपे । ८७औं मिनेटमा मेसीले चौथो गोल गर्दा बार्सिलोनाले पनि ४-० को अग्रता बनायो । ८९ औं मिनेटमा आर्थरले गोल गरेपछि बार्सिलोनाले फराकिलो जित हात पारेको हो ।

पराजित आइबर भने २४ अंकसहित अंकतालिकामा १६औं स्थानमा छ ।