विराटनगर– महिला अनुयायीमाथि जबरजस्ती करणी (बलात्कार) गरेको आरोप लागेका सिद्धबाबा भनिने कृष्ण दास गिरी भारततर्फ ‘भागेका’ छन् ।

सुरक्षाका लागि सरकारले खटाएका प्रहरीलाई फिर्ता पठाएर गिरी जोगबनी नाका हुँदै भारततर्फ भागेका हुन् ।

विराटनगर उच्च अदालतमा आफूविरुद्धको बलात्कार मुद्दामा सुनुवाई चलिरहकै बेला गिरी भने अदालतमा समेत उपस्थित नभइ भारततर्फ भागेका हुन् ।

बलात्कार आरोपमा पक्राउ परेका गिरीलाई जिल्ला अदालत सुनसरीले धरौटीमा रिहा गर्ने आदेश दिएको थियो ।

जिल्ला अदालत सुनसरीको आदेशविरुद्ध उच्च सरकारी वकिल कार्यालय विराटनगरले उच्च अदालतमा ‘पुनरावलोकन’ मुद्दा दायर गरेको थियो ।

गत पुस २३ गते दर्ता भएको मुद्दामा उच्च अदालत विराटनगरले बिहीबार तेस्रो पटक पेशी तोकेको थियो । बिहीबार उच्च अदालतका न्यायाधीशद्वय तिलप्रसाद श्रेष्ठ र प्रेमराज कार्कीको संयुक्त इजलाशमा सुनुवाई भइरहेको छ ।

बिहीबार बिहान सुनसरीको चतरास्थित आश्रमबाट उच्च अदालत जान भनेर हिँडेका सिद्धबाबा अदालत नै नपुगी जोगबनी नाकातर्फ लागेका थिए ।