कैलाली- नेकपाका स्थायी कमिटी सदस्य भीम रावलले कुनै पनि हालतमा नेपाल कम्युनिस्ट पार्टी (नेकपा) नफुट्ने दाबी गरेका छन् ।

कैलालीमा पत्रकारहरूसँग कुरा गर्दै नेता रावलले अध्यक्षद्वयको अन्तर्विरोधकै कारण पार्टी नफुट्ने दाबी गरेका हुन्। नेकपा स्थायी कमिटी सदस्यसमेत रहेका नेता रावलले सरकार भने परिवर्तन हुन सक्ने सङ्केत गरे ।

उहाँले प्रधानमन्त्री एवं पार्टी अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्ड दुवै जनाकाे पार्टी फुटाउने योजना नरहेको उल्लेख गर्दै पार्टी कुनै माटोको हाँडी नभएकाले कुनै व्यक्तिले लट्ठीले हानेर नफुट्ने ठोकुवा गरे ।

नेता रावलले अध्यक्षद्वयले आफ्ना धारणा र विचार प्रतिवेदनका रूपमा बैठकमा प्रस्तुत गरी निर्णय गर्नु राम्रो कुरा भएको बताए ।

कुनै सैद्धान्तिक र नीतिगत मतभेद नभइ कार्यशैली, विधि र विधानका विषयमा मात्रै बहस चलिरहेकाले त्यसले मात्रै पार्टी फुट्ने सम्भावना नरहेको रावलले भनाइ थियो ।

नेता रावलले यही १३ गते बोलाइएको सचिवालय र स्थायी कमिटी बैठकसँगै केन्द्रीय कमिटीको बैठकमा पार्टीमा देखिएका समस्याहरू माथि घनिभूत छलफल हुने बताए ।

उनले भने, ‘नेकपा ठूलो पार्टी हो, ठूलो ठाउँमा विवाद भइहाल्छ, तर पार्टी नै फुटिहाल्छ भन्ने अवस्था अहिले छैन ।’

नेता रावलले पार्टी फुटाएर कसैलाई फाइदा नहुने बताए । उनले प्रधानमन्त्रीले पार्टी फुटाएर त्योभन्दा ठूलो पद के नै पाउने वा प्रचण्डले योभन्दा ठूलो कुन पार्टीको नेतृत्व गर्न पाउने भन्दै प्रतिप्रश्न समे गरेका थिए ।