भक्तपुर – भक्तपुरको खरिपाटीस्थित नेपाल विद्युत् प्राधिकरणमा कोरोना संक्रमित राख्न बनाइएको आइसोलेसन कक्षको बागमती प्रदेशका सामाजिक विकासमन्त्री युवराज दुलालले निरीक्षण गरेका छन् ।

सरकारले खरिपाटीमा बनाएको क्वारेन्टिनलाई ५०० बेडको आइसोलेसन बनाउन निर्देशन दिएपछि धमाधम आइसोलेसन कक्ष बनाइरहेको उक्त स्थानको प्रदेशमन्त्री दुलाले निरीक्षण गरेका हुन् ।

भक्तपुर अस्पतालको नेतृत्वमा २०० बेडको आइसोलेसन बनाएपछि शनिबार मन्त्री दुलाल खरिपाटी पुगेका हुन् ।

सो अवसरमा उनलाई अस्पताल विकास समितिका अध्यक्ष मिलन सुवाल र मेडिकल सुपरिटेण्डेण्ट डा.सुमित्रा गौतमले आइसोलेसनको बारेमा जानकारी गराए ।

मन्त्री दुलालले भक्तपुर अस्पतालमा निर्माण भएको सघन उपचारकक्ष (आइसीयू) र आइसोलेसन सेन्टरको निरीक्षण गरे ।

सो क्रममा अस्पतालका अध्यक्ष सुवाल र मेसु डा.गौतमले सरकारको निर्देशनानुसार भक्तपुर अस्पतालमा ३० बेड आइसीयू र आइसोलेसन तथा खरिपाटीमा २०८ बेड गरी २३८ बेड तयार गरिएको जानकारी गराइन् ।

खरिपाटीस्थित आइसोलेसनमा शनिबार १० र भक्तपुर अस्पतालमा चार बिरामी आइसोलेसनमा राखिएको उनले जानकारी दिइन् ।