काठमाडौं– नेपाल कम्युनिस्ट पार्टीका उपाध्यक्ष वामदेव गौतमले आफूले चीनसँग हतियार लिएर भारतसँग बदला लिनुपर्छ नभनेको स्पष्ट पारेका छन् ।

उपाध्यक्ष गौतमले भारतसँगको सीमा विवाद कूटनीतिक वार्ताका माध्यमबाट सुल्झाउनपर्ने उल्लेख गर्दै सरकार र जनता सीमा विवादको समाधान कुटनीतिक विधिबाट गर्न दृढ रहेको बताएका छन् ।

चीनसँग हतियार लिएर भारतसँग बदला लिनुपर्छ भन्नु अव्यवहारिक, असान्दर्भिक तथा उत्तेजक अभिव्यक्ति भएको र आफूले यस्तो भन्दैनभनेको उनले जिकिर गरेका छन् ।

केही सञ्चारमाध्यमले गौतमले भारतसँग लड्न चीनसँग सहयोग लिनुपर्ने भनेको भन्दै समाचार प्रकशित भएकोमा उनले त्यसको खण्डन गर्दै यस्तो बताएका हुन् ।

उनले राष्ट्र र राष्ट्रियताका मुद्दामा आफूलाई स्पष्ट रुममा प्रस्तुत गर्दै आएको, विगतमा भएको असमान महाकाली सन्धि, कालापानी, लिपुलेक, लिम्पियाधुरामा भूमि अतिक्रमित भएको सन्दर्भलगायत विषयमा सधैँ स्पष्टताका साथ लागिरहेको समेत बताए ।