काठमाडौं- सांसदहरुले स्वास्थ्य सामग्री खरिदको जिम्मा ओम्नी समूहलाई देखाएको हतारले अनियमितता भएको आशंका जन्माएको बताएका छन् ।

सिंहदरबारमा सोमबार बसेको प्रतिनिधिसभा अन्तर्गतको सार्वजनिक लेखा समिति बैठकमा उनीहरुले ओम्नीलाई स्वास्थ्य सामग्री खरिदको जिम्मा दिनका लागि चैत १२ गते भएका बैठकका श्रृंखलाले अनियमितताको आशंका जन्माएको धारणा राखेका हुन् ।

रातारात ओम्नी समूहलाइ नै किन स्वास्थ्य सामग्री खरिद गर्न दिइयो भन्दै उनीहरुले प्रश्न समेत गरेका थिए ।

छलफलमा नेकपाका सांसद बिरोध खतिवडाले १२ गते रातीभर बैठक बसेर ओम्नी समूहलाई स्वास्थ्य सामग्री खरिद गर्न दिनुले आशंका उब्जिएको बताए ।

त्यस्तै कांग्रेस सांसद डा मिनेन्द्र रिजालले स्वास्थ्य सामग्री खरिदको जिम्मा ओम्नी समूह दिने बिषयमा चित्तबुझ्दो जवाफ आउन नसकेको बताए । उनले प्रारम्भिक छलफलमा नै सहभागी नभएकालाई ठेक्का दिएको विषय सन्देशपूर्ण रहेको धारणा राखे ।

जनता समाजवादीका सांसद प्रदिप यादवले स्वास्थ्य सामग्री खरिदमा सार्वजनिक खरिद प्रणालीको धज्जी उडाएको र यसमा मन्त्रीसम्मको संलग्नता रहेको देखिएको बताए ।

बैठकमा प्रधानमन्त्री कार्यालयका सचिव नारायणप्रसाद बिडारीले कोरोना भाइरस संक्रमण नियन्त्रण र रोकथामका लागि सरकारले प्रदेश र स्थानीय तहहरूलाई विनियोजन गरेकोबारे जानकारी दिएका थिए ।

बैठकमा स्वास्थ्य सचिव लक्ष्मण अर्याल र स्वास्थ्य सेवा विभागका महानिर्देशक दिपेन्द्ररमन सिंहले आफूहरु भर्खरमात्र जिम्मेवारी सम्हालेकाले धेरै जानकारी नभएको जवाफ दिएका थिए ।

समितिले चैत दोस्रो सातामा भएको कोरोना भाइरस संक्रमण नियन्त्रणका लागि ओम्नी समूहले खरिद गरेको सामग्रीमा अनियमितता भएको भन्ने सार्वजनिक भएको विषयमा सरोकारवाला अधिकारीहरुसग छलफल गरेको हो ।

स्वास्थ्य तथा जनसंख्या मन्त्रालयले ओम्नी समूहसँग सामान खरिद गर्दा स्वास्थ्य विभागका महानिर्देशकलाई बाइपास गरेर सम्झौता गरेको थियो ।

स्वास्थ्य सामग्री खरिद प्रक्रियामा अनियमिता भएको भन्दै चर्को विरोध भएपछि सरकारले चैत २० गते ओम्नीसँग गरेको सम्झौता रद्द गरेको थियो । त्यसपछि सरकारले स्वास्थ्य सामग्री खरिदको जिम्मा नेपाली सेनालाई दिएको थियो ।

सोमवारको बैठकमा स्वास्थ्य तथा जनसंख्या मन्त्रालयका सचिव, प्रधानमन्त्री कार्यालयका सचिव र स्वास्थ्य विभागमा महानिर्देशकलाई समितिमा बोलाइएको थियो ।