बैतडी- शुक्रबार कोरोना भाइरसको संक्रमण पुष्टि भएका बैतडीका एक जना प्रहरी हिरासतमा रहेका युवा भएको खुलेको छ ।

जिल्ला प्रहरी कार्यालयको हिरासतमा रहेका २२ वर्षीय पुरुषमा कोरोना संक्रमण पुष्टि भएको हो । शिवनाथ गाउँपालिका २ का ती पुरुष गत चैत ६ गते भारतको नयाँ दिल्ली गुडगाउँबाट नेपाल आएका थिए ।

एक किशोरीको मृत्यु प्रकरणमा उनी पक्राउ परेका थिए । ती युवकको धनगढीमा थ्रोट स्वाब परीक्षणपछि कोरोना संक्रमण पुष्टि भएको जिल्ला अस्पताल बैतडीका प्रमुख डा. वसन्तराज जोशीले जानकारी दिए ।

उनले भने, ‘प्रहरीको हिरासतमा रहेका २२ वर्षीय युवकमा कोरोना संक्रमण पुष्टि भएको छ । उनलाई जिल्ला अस्पतालको आइसोलेसनमा राख्ने तयारी भएको छ । ती युवकको स्वास्थ्य अवस्था समान्य रहेको बुझिएको छ ।’

कर्तव्य ज्यान मुद्दामा प्रहरी हिरासतमा रहेका युवकमा कोरोना संक्रमण देखिएपछि जिल्ला प्रहरी कार्यालय सिल गरिएको छ ।

हिरासतमा रहेका युवकमा कोरोना पुष्टि भएपछि कन्याक्ट ट्रेसिङको काम समेत शुरु भएको जिल्ला प्रहरी कार्यालयका प्रहरी नायव उपरीक्षक डिल्लीनारायण पाण्डेयले बताए ।