कैलाली- शुक्रबार कोरोना संक्रमण पुष्टि भएका कैलालीका तीन जना मध्ये एक जना भारतबाट, एक नेपालगञ्ज र अर्का इटहरीबाट आएको खुलेको छ ।

कैलालीको जानकी गाउँपालिका १ मा रहेको सरस्वती माध्यमिक विद्यालयको क्वारेन्टाइनमा रहेका तीन जना पुरुषमा कोरोना संक्रमण पुष्टि भएको स्वास्थ्य मन्त्रालयले जनाएको थियो ।

जानकी गाउँपालिकाका स्वास्थ्य शाखा प्रमुख जीतबहादुर चौधरीका अनुसार कोरोना पुष्टि हुनेमा इटहरीबाट वैशाख ३० गते आएका जानकी गाउँपालिका ७ जवलपुरका १९ वर्षीय युवक छन्।

त्यस्तै वैशाख १ गते भारतको महाराष्ट्रबाट आएका जानकी गाउँपालिका ४ कञ्चनपुरका २६ वर्षीया पुरुष र वैशाख १ गते बाँकेको नेपालगञ्जबाट आएका जानकी गाउँपालिका ७ मोतिनगरका २१ वर्षीय पुरुष रहेका छन् ।

तीनै जनाको स्वास्थ्य अवस्था सामान्य रहेको उनले बताए ।

धनगढीस्थित प्रयोगशालामार्फत गरिएको परीक्षणमा उनीहरुमा कोरोना पुष्टि भएको हो। योसँगै बैतडी र डडेल्धुराका दुईजना युवामा समेत कोरोना पुष्टि भएको छ।

यसअघि सुदूरपश्चिमका ५ जना कोरोना पुष्टि भएकोमा उनीहरु सबै उपचारपछि निको भएर घर फर्किसकेका छन् ।