नवलपुर । पूर्वी नवलपरासीको पहाडी क्षेत्र बुलिङटार गाउँपालिकाको डाँडाझेरी टाँडीमा पहिरोले घर पुरिँदा २ जना बेपत्ता भएका छन् ।

बुलिङटार गाउँपालिका २ डाडाझेरी टाँडीस्थित शेरबहादुर सार्कीको घर मंगलवार विहान पुरिँदा ७० वर्षीय शेरबहादुर र उनकी श्रीमति बेपत्ता भएको बुलिङटार गाउँपालिकाका अध्यक्ष शशी बस्ताकोटीले जानकारी दिए । सुतेकाबेला बिहान ३ बजेतिर एक्कासी पहिरो खसेर घर पुरेको स्थानीयले बताए ।

बुलिङटारबाट प्रहरीटोली बिहान घटनास्थलतर्फ गएको नवलपुरका प्रमुख जिल्ला अधिकारी पिताम्बर घिमिरेले जानकारी दिए । पहिरोले पुरेको ठाउँमा पुग्न दुई घण्टा पैदल हिड्नुपर्ने भएकाले प्रहरी घटनास्थल पुगिनसकेको उनले बताए ।

बाढीले पिकअप भ्यान बगायो

पूर्वी नवलपरासीकै विनयी त्रिवेणी ४ स्थित भित्रि सडक खण्डमा दुम्किबासबाट पितरीतर्फ जाँदै गरेको लु २ च ६१७१ नम्बरको पिकअप भ्यान स्थानीय खहरे खोलाले बगाएको छ । गएराती बाढीले बगाएको पिकअप २५ मिटर तल फेला परेको प्रहरी नायव उपरीक्षक मोहनबहादुर खाँडले बताए । घटनामा मानवीय क्षति भने नभएको खाँडले जानकारी दिए ।

बोटेबस्तीका ३० घर डुबानमा

नवलपुरकै गैडाकोट नगरपालिका २ स्थित बोटेबस्तीका ३० घर डुबानमा परेको छ । प्रजिअ घिमिरेले सोमबार बेलुका बाढी प्रभावित क्षेत्रको अवलोकन गरेका थिए ।