काठमाडौं– नेपालमा हालसम्म मृत्यु भएका कोरोना संक्रमितहरुमध्ये अधिकांश विभिन्न किसिमको दीर्घरोगी समेत भएको स्वास्थ्य मन्त्रालयले जनाएको छ ।

स्वास्थ्य मन्त्रालयको नियमित लाइभ अपडेट मार्फत इपिडिमियोलोजी तथा रोग नियन्त्रण महाशाखाका निर्देशक डाक्टर बासुदेव पाण्डेले मृत्यु भएका २३ जना व्यक्तिहरुमा कोरोना संक्रमण बाहेक अन्य रोग समेत रहेको जानकारी दिएका हुन् ।

“आजसम्म मृत्यु भएकाको अवस्था हेर्दा मृत्यु भएका २३ मध्ये ४ जना महिला र बाँकी पुरुषहरु हुनुहुन्छ,” डा पाण्डेले भने, “उहाँहरुको मृत्यु कोभिड-१९ को कारणले मात्र नभएको  र उहाँहरुलाई अन्य दीर्घरोग कारण पनि भएको देखिन्छ ।”

डा पाण्डेका अनुसार मृत्यु भएका संक्रमितमध्ये धेरै जस्तोमा मिर्गौला र दमका रोग भएका व्यक्तिहरु हुन् । डा पाण्डेले ६ देखि ८ दिनमा कोरोना संक्रमितको केशको दर बढेको पनि बताए ।

उनले नेपालमा रहेका कोरोना संक्रमित ९५ प्रतिशत विदेशबाट आएका र ती मध्ये पनि भारतबाट आएका धेरै भएको बताए ।

महाशाखाले कन्ट्रयाक ट्रेसिङका लागि २० वटा टिम तयारी अवस्थामा रहेको र प्रत्येक प्रदेशमा ३ वटा टिम रहेको पनि डा पाण्डेले जानकारी दिए ।

यस्तै स्वास्थ्य मन्त्रालयले एक हजार ७५ कन्ट्रयाक ट्रेसिङको टिम स्थानीय तहमा गठन भएको पनि जानकारी दिएको छ ।