काठमाडौं- बंगलादेशमा रहेका २४७ जना नेपाली आज नेपाल आउँदै छन् ।

बंगलादेशमा रहेका विभिन्न मेडिकल कलेजमा अध्ययनरत २४७ जना नेपाली विद्यार्थीहरु आज नेपाल आउन लागेका हुन् ।

सरकारले विदेशमा रहेकाहरुलाई उद्धार कार्य शुरु गरेपछि उनीहरु आज नेपाल आउन लागेको नेपाली विद्यार्थीहरुले बताएका छन् ।

बंगलादेशमा रहेका नेपाली विद्यार्थीहरुले प्रतिव्यक्ति १९ हजार नेपाली रुपैया आफैले तिरेर नेपाल आउन लागेका नेपाली विद्यार्थी डायमन्ड लामिछानेले खबरहबलाई बताए । बंगलादेशमा रहेका सबै नेपालीले त्यहि पीसीआर परीक्षण गरी रिपोर्ट नेगेटिभ आएका व्यक्तिहरु नेपाल फर्किन लागेको लामिछानेले बताए ।

‘हामी सबैले यही पीसीआर परीक्षण गरेर रिपोर्ट नेगेटिभ आएर नै नेपाल फर्किन लागेका छौं, भाडा आफैले तिर्नु परेपनि सरकारले हामीलाई उद्धार गरेकोमा खुसी लागेको छ,’ लामिछानेले खबरहबसँग भने,‘हामीलाई नेपाल उद्धार गर्न सहयोग गर्ने बंगलादेशमा रहनुभएका नेपाली राजदुतलाई हामी धेरै धन्यवाद दिन चाहन्छौं । नेपाल आइपुगेर सरकारले तोकेको ठाउँमा हामी बस्न तयार छौं ।’

धेरै महिनादेखि बंगलादेशमा अलपत्र परेका विद्यार्थीहरु आज नेपाल फर्किन पाएकोमा खुसी भएका छन् । बंगलादेशबाट नेपाल फर्किन लागेकी डा कुसुम देवकोटाले नेपाल फर्किन लागेको भन्दै खुसी व्यत्तः गरिन् ।

‘हामी धेरै समयदेखि यहाँ अलपत्र परेका थियौं, मेरो त इन्टन पनि सकिएको थियो यहाँ यतिकै बसेको थिए,’देवकोटाले खबरहबसँग भनिन्, आज नेपाल फर्किदा पाउँदा खुसी लागेको छ ।’

उनीहरुलाई नेपाल ल्याउन नेपाल एयरलाइन्सको विमान बंगलादेशमा हजरत शाहजलाल अन्तराष्ट्रिय विमानस्थलमा डेढ घण्टा अगाडी नै पुगेको थियो । उनीहरु अहिले नेपाल फर्किदै छन । यसअघि ३ वटा विमानमार्फत ६ सय नेपाली विद्यार्थीहरु बंगलादेशबाट नेपाल फर्किएका छन् ।