सप्तरी– शान्ति सुरक्षा र प्रहरीको छविमा आँच आउने गरी झुठो अफवाह फैलाएको आरोपमा सप्तरी प्रहरीले १ जनालाई पक्राउ गरेको छ ।

पक्राउ पर्नेमा सप्तरीको राजविराज नगरपालिका-४ बस्ने २६ वर्षीय दिवाकर कुमार साह छन् । प्रहरीले साहलाई मंगलबार दिउँसो पक्राउ गरेको हो ।

साहले खडक नगरपालिका-६ बीरपुर बस्ने ६५ वर्षीया महिलाको सगरमाथा अञ्चल अस्पतालमा उपचारको क्रममा सोमबार बिहान मृत्यु भएको सम्बन्धमा सामाजिक सञ्जाल फेसबुक लाईभ मार्फत अफवाह फैलाएको प्रहरीको आरोप छ ।

प्रहरीले कुटपिट गर्दा उनको मृत्यु भएको भनी झुठो अफवाह फैलाएपछि सोही नगरपालिका-७ कुनैलीमोडबाट साहलाई पक्राउ गरिएको जिल्ला प्रहरी कार्यालय सप्तरीले जानकरी दिएको छ ।

जिल्ला प्रहरी कार्यालय सप्तरीले पक्राउ परेका साहमाथि थप अनुसन्धान भइरहेको जनाएको छ ।