भारत- गत सोमबार निधन भएका भारतको उत्तर प्रदेशका मुख्यमन्त्री योगी आदित्यनाथ पिताको आज अन्त्यष्टि गरिँदैछ ।

आज उनको अन्त्यष्टि गरिने भए पनि मुख्यमन्त्री आदित्यनाथले लकडाउनको कार्यान्वयन र कोरोनाभाइरस विरुद्धको लडाईंका कारण उपस्थित नहुने बताएका छन् ।

कठोर धार्मिक स्वभावका आदित्यनाथ आफ्नै पिताको अन्त्येष्टिमा पनि सहभागी नहुनुलाई अनौठो र अस्वभाविक घटनाको रुपमा लिइएको छ ।

मुख्यमन्त्री योगीका पिता आनन्द सिंह विष्टको सोमबार नयाँ दिल्लीस्थित एम्स अस्पतालमा निधन भएको हो । उत्तर प्रदेशका अतिरिक्त मुख्यसचिव आश्विन कुमार अवस्थीले मुख्यमन्त्री योगीका पिता विष्टको स्थानीय समय अनुसार विहान १०.४४ बजे निधन भएको जानकारी दिए ।

उनको अन्त्येष्टिमा मलामीहरुको सङ्ख्या पनि न्युन गराउन जोड दिएको पनि मुख्यसचिव अवस्थीले बताए।

त्यसैगरी उत्तर प्रदेशका गभर्नर आनन्दीबेन पटेलले मुख्यमन्त्री योगीलाई पितृशोक परेकोमा दुःख व्यक्त गरेका छन् । त्यसैगरी अन्य शीर्ष नेता तथा सरकारका उच्च अधिकारीहरूले पनि विष्टको निधनप्रति दुःख व्यक्त गरेका छन् ।