काठमाडौं– होटल व्यवसायीहरुले कोरोना भाइरस संक्रमणको जोखिम कम गर्न क्वारेन्टाइन बनाउनका लागि आफूहरुले होटल उपलब्ध गराउने प्रतिबद्धता जनाएका छन् ।

होटल व्यवसायी महासंघ, नेपालका अध्यक्ष हिराध्जव शाहको अध्यक्षतामा शनिबार बसेको होटल व्यवसायीहरुको बैठकले सरकारले आवश्यक ठानेको खण्डमा काठमाडौं उपत्यकामा सञ्चालित होटल तथा रेस्टुरेन्टहरुलाई क्वारेन्टाइन प्रयोजनका लागि उपलब्ध गराउने निर्णय गरेको हो ।

होटल व्यवसायी महासंघको नेतृत्वमा होटल तथा पर्यटन व्यवसायी महासंघ प्रदेश नम्बर ३, काठमाडौं होटल व्यवसायी महासंघका ९ वटा इकाइका अध्यक्षसहितको बैठकले यस्तो निर्णय गरेको हो ।

बैठकले हाललाई कोरोना भाइरसको संक्रमण नियन्त्रणका लागि काठमाडौं उपत्यकामा सञ्चालित होटल तथा रेस्टुरेन्टहरु क्वारेन्टाइनका रुपमा प्रयोग गर्न सरकारलाई उपलब्ध गराउने निर्णय गरेको हो ।

यस्तै, अन्य जिल्लामा सञ्चालित होटलहरुलाई पनि क्वारेन्टाइनका रुपमा प्रयोग गर्ने गरी उपलब्ध गराउनका लागि जिल्ला समितिका अध्यक्षहरु छलफल चलिरहेको होटल व्यवसायी महासंघका अध्यक्ष हिराध्वज शाहद्वारा हस्ताक्षरित विज्ञप्तीमा उल्लेख छ ।